Panganan Tradisional Jawa

Ngajeni Jathi Dhiri Kelawan Panganan

Sumber : https://www.sesorah.com/2016/08/kumpulan-deskripsi-makanan-tradisional-bahasa-jawa.html

Panganan kalebu budaya Indonesia sing kudu dilestarikna. Ora mung dadi jathi dhiri saben pawongan, sewijine sajian panganan uga bisa gambarake karakter sewijine bangsa. Panganan bisa mempresentasikan sewijine negara, lan dadi simbol panyebaran budayane.

Indonesia, yaiku salah sijine negara sing sugih marang panganan khas (tradisi kuliner). Indonesia uga negara kelawan ragam suku lan budaya nglairne panganan kanthi khase dewe-dewe saben daerahe. Sugihe maneka werna panganan Indonesia dadi cerminan keberagaman budaya lan tradisi Nusantara. Panganan khas iki duweni peran sing wigati ing budaya nasional Indonesia, sing kurang luwih dumadi saka 6000 pulo (pulau).

Salah sijine pulo yaiku pulo Jawa, kelawan jumlah penduduk kurang luwih 160 yuta. Pulo Jawa manggoni pulo sing paling jembar nomor 13 ing dunia. Pulo Jawa iki dihuni 60% saka penduduk Indonesia, mula saka iku uga duweni panganan sing maneka werna.

Amung ing tlatah Jawa tengah iku wae wis akeh katemoake panganan khase sing ora padha saben dhaerahe. Panganan-panganan iku digawe saka bahan-bahan kang dumunung ing sakiwa tengene pawongan ing dhaerah kuwi. Bahan-bahan kang wis cumawis lan gampang golekane. Babagan iki ngelingake bilih lemah ing tlatah Indonesia, mligine tlatah Jawa pancen subur kang sarwa tinandur.

Bahan-bahan kasebut kayata; ketan, beras, klapa, pala, gedhang, lan sapiturute. Mula kuwi, kita kudu tansah eling lan syukur mring Gusti kang murbeng jagad awit saka peparinge. Kita uga duweni rasa bombong tumrap tlatahe dhewe-dhewe kang duweni kekhasan maneka werna. 

Nambah rasa bombong maring Gusti, saengga tumeka saiki kita bisa nemoni, mangerteni, uga agawe panganan saka bahan-bahan kang wis cumawis. Tuladhane yaiku kolak.

Sumber: https://id.wikipedia.org/wiki/Berkas:Kolak_Pisang.jpg

          Kolak yaiku panganan utawa ombenan kang ana ing Indonesia. Bahan dasare kolak bisa kagawe saka maneka werna, kaya gedhang, tela, pohung, nangka, lan sapiturute. Bahan-bahan kuwi mengko digodhog banjur diwenehi duduh legi saka bahan santen lan gula Jawa utawa gula putih. Kolak akeh maceme, gumantung bahan dasare, nanging kabeh kuwi mau uga bisa dicampur siji lan karone manut kapenginan (selera). Kolak iki biyasane kanggo suguhan pambuka nalikane ing wulan Pasa, amarga kolak dhewe duweni rasa sing manis lan ana duduhe. Kayata pas nalikane kanggo buka, kang sunahe mangan sing manis-masis dhisik.       

        Bahan dasar kang sengaja dipilih ing dhuwur, kayata pala kependhem 'pala terpendam' duweni ancas supaya kita tansah eling sewijine dina manungsa bakal den pendhem ing kubure. Mula saka kuwi, kita kudu apik guyup rukun marang liyan. Amarga kita ora reti kapan bakal den timbali marang Gusti. Kolak uga den sartani santen dadi duduhe, kang jeneng santen kuwi dijupuk saka ukara "sing salah nyuwun pangapunten", mula saka panganan iki uga ngelingake kita yen duwe salah kudu jaluk ngapura, marang manungsa utawa marang Gusti Kang Maha Kuasa.

Teks Deskripsi ing dhuwur kuwi mau gambaran salah siji panganan khas tradisional Jawa. Saka  nyinau panganan kita bisa jupuk pepeling lan nguri-uri budaya dhewe. Ayo melu nguri-uri kabudayan Jawa nganggo tulisan teks deskripsi. Supaya luwih gamblange kepiye gawe panganan kolak, semaken video ing ngisor iki. (Ayu Safitri)